Ити былдьаґыктаах күннэргэ бассабыык баартыйата уонна норуот муударай сирдьитэ, кылаабынай командующай улуу Сталин тулхадыйбат аптарытыаттара, түмэр-көҕүлүүр уһулуччулаах талааннара, дойдуну бүтүннүүтүн биир сутурукка сомоҕолуур сэбиэскэй систиэмэ быһаарар оруолламмыттара диэн кырдьыгы сирэйинэн этэн кэбиһиэхтээхпит. Саха сирэ фроҥҥа үтүмэннээх көмөтүн туһунан историктар дириҥник үөрэтэн, хас да монографияны утуу-субуу суруйталаатылар. Алдан, Бодойбо кыһыл көмүстэрэ (биһиэхэ Хахтаахха, Тоҥуону усталыы, Даалыкынаҕа эмиэ элбэхтик сууйа сылдьыбыттара), кылааннаах түүлээх эгэлгэ арааһа дойду валютнай фондатын төһөлөөх хаҥатан сэрии сэбэ, ас-үөл бөҕөнү атыылаһар кыаҕы биэрбиттэрин, үрүҥ аһа-үөлэ төһөлөөх күүһү кыаҕы, энчирээбэт эрчими сэниэни эппитин, куобах куллуку, түүлээх үтүлүк, бэргэһэ, таба саҕынньах үлүйүүттэн өрүһүйбүтүн ким да мэлдьэһэр кыаҕа суох, Сахабыт сирин өлгөм кылаата ырылыччы көстө сытар.
Мантан салгыы биһиги нэһилиэктэн төрүттээх, үлэ фронугар сылдьыбыт тыыл ветераннарын, илэ хараҕынан көрөн улааппыт Винокурова Татьяна Ефремовна — Сабыйа поэма суруйбутун таһаарабыт. Худуоһунньугунан Иванов Елисей Капитонович үлэлэстэ.
