Магасская модельная сельская библиотека

Дьулурҕан түһүлгэтэ.

Бу дьыл кулун тутар бастакы күнүгэр, Үөһээ Бүлүү улууһун Маҥаас нэһилиэгин, Бүлүү улууһун Тылгыны нэһилиэгин бочуоттаах олохтооҕо, Саха сирин үтүөлээх оһуохай этээччитэ, Саха сиригэр физкультура уонна спорт сайдыытыгар үтүөтүн иһин бэлиэ хаһаайына, Cаха Сирин үөрэҕириитин, спордун ветерана, чөл олоҕу  кеҕүлээччи, тэрийээччи, Республикаҕа Бүлүү зонатыгар, Үөһээ Бүлүү улууһун атах оонньуутугар, тустууга, теннискэ, бильярдка, элбэх төгүллээх призера, чемпиона 40 – н үөһээ саастаахтарга күрэхтэһиилэри тэрийээччи, «Үөһээ Бүлүү» хаһыат общественнай корреспондена, Бүлүү бөлөх улуустарын элбэх төгүллээх Аан Дархана Васильев Егор Егорович – Дьулурҕан төрөөбүтэ 75 сылыгар аналлаах оһуохай күрэҕэ уонна ону кытта 40 – нан үөһээ саастаахтарга спорт көрүҥнэригэр күрэхтэһии буолан ааста.
                                                                                                                                            
Егор Егорович Васильев – 1950 сыллаахха тоһуттар тымныы ааҥнаан, айылҕа иһийэн турдаҕына, тохсунньу 8 күнүгэр, Маҥаас нэһилиэгэр төрөөбүтэ. Олоҕун устатын тухары, оҕону чөл туруктаах иитиигэ бары кыһамньытын ууран туран, физкультура учууталынан үлэлээбитэ. Амарах аҕа, элбэх сиэн тапталлаах эһээтэ, хара тыаҕа таҕыстаҕына, булт арааһын сүгэн – көтөҕөн кэлэр, дьиэ кэргэнигэр бэриниилээх кэргэн этэ.                                                                      Олорбут олоҕор икки сүҥкэн суолталаах дьарыгы өрө тутан: чөл олоҕу спорду кытта дьүөрэлээн, ыччат да саастаах да дьоҥҥо пропагандалааччы,  төрөөбүт төрүт тылын баайын култууратын, оһуохайга тиһэн сырдык өйдөбүллэри  хаалларбыт биир кэрэ  киһибит буолар.                Спордунан кыра оҕо сааһыттан күүскэ дьарыктаммыта. Ол курдук тыа сирин аҥаардас ийэ оҕото буоларын быһыытынан, бэрт элбэхтик сүүрэн – көтөн, араас хара үлэттэн куотуммакка, толлубакка кыра сааһыттан оҕус миинэн, сиэтэн, туохтан да чаҕыйбакка улааппыта.  Ол курдук спорт көрүҥнэриттэн: чэпчэки атлетиканан, национальнай атах оонньууларынан, хапсаҕайдаһан тустуунан үлүһүйэн туран дьарыктаммыта.  Элбэх ситиһиилэммитэ. Физкультура учууталын идэтигэр Дьокуускай куоракка үөрэнэн идэ ылан, Далыр, Маҥаас оскуолаларыгар 1974 сылтан 2000 сылга дылы, бэрт элбэх оҕону үөрэппитэ, уһуйбута, такайбыта. Үөрэппит оҕолоро теннис, хайыһар күрэҕэр улууска киирэн өрүү миэстэлэһэллэрэ.
                                                                                                         
Егор Егорович нэһилиэккэ буолар күрэхтэһиилэргэ биир сүрүн үлэтэ кылаабынай судьуйа буолара. Хас биирдии кыттааччы ханна хайдах тустубутун ис – иһиттэн наһаа үчүгэйдик комментарийдыыра. Ол курдук Тылгыны – Маҥаас доҕордоһуу түһүлгэтин биир тутаах спортивнай оонньуутун тэрийсээччитэ этэ.                                                                                                     Сааһыран баран 1992 сылтан аны өрүс бэтэрээ ветеран спортсменнары нэһилиэктэртэн мунньан (40 саастарыттан үөһээ) сылын аайы күрэхтэһии тэрийбитэ. Бу маны улуустааҕы спорт управленията биһирээн комплекснай спартакиада программатыгар киллэрбитэ. Саастаах дьон быһыытынан наһаа тустуунан сүүрүүнэн – көтүүнэн күрэхтэспэккэ, остуол оонньууларынан, дуобат, саахымат, теннис көрүҥнэригэр күрэхтэһэллэрэ.                                  Кини ити эрэ дьарыгынан уоскуйбатаҕа…. Айар – тутар талаана сааһырдаҕын аайы эбиллэн, саха төрүт култууратын өрө тутан, улуус да нэһилиэк да сылын аайы буолар ыһыаҕар алгыс этэрэ, ырыатын – тойугун сөбүлээн оһуохайга холонон барбыта. Алгыс тылын, тыллары сааһылаан, бэйэ – бэйэлэригэр дьүөрэлээн, аал уот иччитин аһатан, айыылартан көрдөһөрө, тылын сүмэһинэ, ырааһа, кэрэтэ, чуора барыта алгыска түмүллэрэ. Ол курдук тылын саппааһа элбэҕэ.                                                                                                                                
Этэр оһуохайын тыла ураты чуора уонна күүстээҕэ. Элбэх оһуохай күрэҕэр, улууска, региоҥҥа, республикаҕа тиийэ миэстэлэспитэ. Саха сирин үтүөлээх оһуохай этээччитэ, Бүлүү бөлөх улуустарын Аан Дархана ааты сүкпүтэ. Төрөөбүт үөскээбит дойдутугар Маҥааска Бүлүү бөлөх улуустарын оһуохайдьыттарыгар аналлаах, кини аатынан оһуохай күрэҕэ үрдүк таһымнаахтык ыытылынна. Барыта улахан дьоннуун оҕолуун 32 оһуохайдьыт күөн көрүстэ. Улахан дьоҥҥо Аан Дархан ааты Розанна Герасимова ылан, Васильев Егор Егорович. дьоно туруорбут убаһаларынан бириистэннэ. Оҕолорго Үөһээ Бүлүү Хоротуттан,  салайааччы Хаар Семенова, өрөспүүбүлүкээнискэй “Күн оһуохайа” кыттааччыта, эрчимнээх этээччи, Эрика Базюк бастаан Маҥаастан төрүттээх Аан Дархан оһуохайдьыт Ырыа Ыстапаан — Иванов С.И. аатынан, оҕолоро туруорбут 10000 солкуобайынан уонна дьаһалта бирииһинэн, иккис миэстэни Егорова Айкуо пылесоһунан уонна эмиэ эбии дьаһалта бирииһинэн, үһүс миэстэни Степанова Камила сотовай телефонунан наҕараадаланнылар. Кыттыбыт оҕо да, улахан да дьон бары анал ааттаах, илии тутуурдаах, өттүк харалаах бардылар.
                                                                    
Элбэх оҕону оһуохайга уһуйааччы улууска  Өрөспүүбүлүкэҕэ киэҥник биллэр СР культуратын туйгуна Марианна Хобусарова бу да сырыыга «Тэтимнээх этээччи» анал ааты, уонна “Элбэх оҕону уьуйааччы” диэн бириистэри ылла, Егоров Егор Егорович  — Үс Дьөгүөр “Хомоҕой хоһоонноох” этээччи, Зенгенидзева Светлана Николаевна (Сунтаар) “Кэрэ куоластаах” анал ааттары ылан сыаналаах бириистэр хаһаайыттара буоллулар.                  Ону кытта тэҥинэн спортивнай заалга түөрт көрүҥҥэ тенниска, дуобакка, баарыска, дартска  Мэйик, Далыр, Маҥаас хамаандата 40 сааһыттан үөһээ спорт ветераннара  күрэхтэстилэр. Кылаабынай судьуйанан эдэр физкультура учуутала Саллар Томскай   үлэлэстэ. Боковой судьуйаларынан Егор Егорович Васильев сиэн уолаттара, Василий Евсеев – Үөһээ Бүлүү тренер учуутала, Константин Обутов – мас реслиҥна улуус хамаандатын сборнайын кыттыылааҕа, Мыскат Мыскатов – Бүлүү хамаандатын мас реслинҥа сборнайын кыттыылааҕа, Василий Винокуров — Васильевтар кыра күтүөттэрэ көмөлөстүлэр. Кыайыылаахтар сыаналаах Егор Егорович дьиэ кэргэнэ туруорбут бириистэринэн уонна грамоталарынан наҕараадаланнылар.
                                                                                                                
Күрэхтэһиилэр түмүктэрин таһаарар жюрилар үлэлэрин кэмигэр, Васильевтар күтүөттэрэ Саха Республикатын туйгуна, Саха Республикатын үтүөлээх артыыһа, Туймаада ансаабыл ырыаһыта, билигин Ньурба улууһун оҕо ускуустубатын оскуолатын дириэктэрэ Илья Николаев кыттыылаах уонна хаан уруу чугас аймахтарын күүһүнэн концерт көрдөрдүлэр.   
                                                                                                                  
Васильев Егор Егорович кэргэнэ Светлана Семеновна, уонна биэс төрөппүт кыргыттара аҕаларын аатын өрө тутан, “Түҥ былыргы теруттэрбит тустарынан үһүйээннэр” диэн, суруйан испит кинигэтин үйэтитэн күн сирин көрдөрдүлэр. Бу иннинэ нэһилиэк историятын кэрэһэлиир үс кинигэни таһаартарбыта. Хас да сыл улуус хаһыатын селькорынан ананан суруксуттаабыта.                       
Дьэ, ити курдук Егор Егорович Васильев – Дьулурҕан, саха дьонун өйдөбүлүнэн бу Орто  туруу – бараан дойдуга олорон ааспыт олоҕун киэҥ эйгэҕэ таһааран оҕолоро, сиэннэрэ, күтүөттэрэ, аймах – билэ дьоно үйэтиттилэр.

Контакты

Адрес: 678230, Республика Саха (Якутия), Верхневилюйский улус (район), с. Верхневилюйск, ул. Октябрьская, дом 17

Email: vvlib@mail.ru
Телефон: +7 (4113) 34-12-28

О нас

Мы сеть из 23 библиотек Верхневилюйского улуса

Централизованная библиотечная система состоит из Центральной модельной библиотеки им. О.Д. Федоровой, детской библиотеки и 21 библиотеки-филиала

Часы работы

Понедельник — Пятница
09:00 — 18:00

Суббота
10:00 — 17:00

Воскресенье
Выходной

2025 © МКУ "Верхневилюйская МЦБС"