Сэтинньи сэттистиир күүрээннээх күнүгэр,
Сэриинэн сэтэрэн, уотунан умайан,
Сир ийэ үрдүнэн силлиэлээх холорук
Силлиэрэн – боллоорон ытыллан таҕыста…
Бары баар баттаммыт
Барыта тахсаннар
Барабаан охсоннор
Баргыйан бардылар…
Уруйдааҥ! Уруйдааҥ!
Былааһы – Сэбиэккэ!
Хара хаан олбохтоох хаппытаал олоҕун,
Хап гынар хаппардаах хаан салыҥ хаайыытын,
Түп гынар түптүрдээх түүнүктээх түрмэтин
Түҥнэри ытыйан, күөрчэхтии көтүттэ…
Өлөртөн куттаммат,
Өргөстөн дьулайбат,
Кэннинэн кэхтибэт
Кэм кэллэ быһыылаах
Уруйдааҥ! Уруйдааҥ!
Былааһы – сэбиэккэ!
Хандала күүһүнэн, хабала дьайынан
Хамныыртан – хараттан хааныттан хараммыт,
Кыраттан – кыамматтан, дьон – норуот соруттан, Кырыыстан – ынчыктан баараҕай баайдаммыт Баай бампыыр батталын.
Батталлаах былааһын
Үлэһит бааһынай
Үҥүүнэн үрэйдэ…
Уруйдааҥ! Уруйдааҥ!
Былааһы – сэбиэккэ!
Имэҥнээх санаанан, илбистээх ырыанан
Ийэ сир үрдүнэн, аан дойду баһынан
Кытыастар хаанынан. кырбаһар уотунан
Кырыыстаах дойдуну кытыаста салатан.
Биитэр мин, биитэр эн –
Биирдэспит кыайдын диэн Өрөгөй өлөрсүү
Өһүөнэ үрдээтин….
Уруйдааҥ! Уруйдааҥ!
Былааһы – сэбиэккэ!
Үйэттэн үйэҕэ үрүҥ күн анныгар
Үлэһит бааһынай симэһин сииктэрин.
Күдэхтээх күүстэрин күнүстэри – түүннэри
Күүгэннии оргутан оборо олорбут
Буулаҕа бурсуйу
Буруйдаан – сэмэлээн
Үлэһит, бааһынай
Үөрбэҕэ түһэрдэ….
Уруйдааҥ! Уруйдааҥ!
Былааһы – сэбиэккэ!
Үлэһит, бааһынай үлэтин түмүктээн
Үүнээхтээн тахсыбыт көҥүлбүт олоҕун
Барыктаах – сарыктаах кыһаҕа кытардан –
Баабырдыын балталаан баргыйан иһиэххэ….
Наахара хааннанан
Набааты охсунан,
Аан дайды үрдүнэн
Арбыйа оонньуохха…
Уруйдааҥ! Уруйдааҥ!
Былааһы – сэбиэккэ!
Бары сир үрдүнэн, баай бампыыр аймаҕа
Бары баай баттаммыт хааннарын тоҕоннор,
Уҥуохтаахх эттэрин урусхал оҥорбут
Улуу хаан иэстэрин иэстииргэ тэринэн…
Үлэһит, бааһынай
Үҥүүнэн – үөрбэнэн
Тиис тиискэ, хаан хааҥҥа
Тиийбитин биллинэр…
Уруйдааҥ! Уруйдааҥ!
Былааһы – сэбиэккэ!
Үлэһит, бааһынай этигэр – хааныгар
Үйэттэн үйэҕэ үөдүйэн үөскээбит,
Иҥээхтээн сылдьыбыт илбистээх үөрэхтэр
Имэҥнээн – илбистээн, кыырыктаан – кылыстаан.
Баттаммыт туруута
Бассабыык баартыйа
Кынаттаах тылынан
Кыайыыта үрдээтэ…
Уруйдааҥ! Уруйдааҥ!
Былааһы – сэбиэккэ!
Уон сылга уот төлөн күүһүрэн күүрэммит —
Уруйдаан, айхаллаан, сэбиэскэй былааһы
Аан дойду алтаттан биирдэрин үрдүгэр
Аарыктаан айдааран үрдэтэн эрэбит….
Биитэр мин, биитэр эн –
Биирдэспит кыайдын диэн
Бары сир баһынан
Баттаммыт баргыйдын…
Уруйдааҥ! Уруйдааҥ!
Былааһы – сэбиэккэ! 29.12.1926 сыл
Өктөөп хартыынатын пазлын таҥан таһаар
Өктөөп күнүнэн!
