Бүгүн ахсынньы 16 күнүгэр, улуус кииниттэн ыраах сытар, кыракый Маҥаас нэһилиэгэр икки бүк үөрүүлээх күн буолла. Ол курдук бастыкытынан, 2020 сыллаахха Үөһээ Бүлүү улууһугар саамай элбэх сууммалаах РФ КРСТ госпрограмматыгар кыттаммыт, нэһилиэкпитигэр бастакы таас объект, о.э. детсад тутуута сааһыары сайын саҕаламмыта. Суол хаалаары, ириэрии бөҕө кэмигэр, тутуу материала таһыллан барбыта. Нэһилиэкпит баһылыга Аркадий Дмитриевич Донской депутаттар сессияларыгар, 2022 сылга үлэҕэ киирэр диэн эппитигэр соһуйан эрэ хаалбыппыт.. Нэһилиэк олохтоохторо эмиэ, ама икки сылы кыайбат кэмҥэ, итиччэ сүҥкэн улахан тутуу үлэҕэ киириэ дуо, диэн мунаарбыттара. Тутууну, суол – иис куһаҕанын аахсыбакка ООО «Сахаспецмонтаж».директора Петров Дмитрий Алексеевич ылсыбыта. Тутуу матырыйаалын, сайыҥҥы ардахтаах бадарааҥҥа араас техниканнан бары тастаран, итэҕэһин тутатына аҕалтаран тутуу харгыстаммакка силигин ситэттэрэн испитэ. Ол түмүгэр, түбүктээх, сыралаах үлэ түмүктэнэн, сабыс саҥа уһуйаан дьиэтэ, иһинэн – таһынан араас уотунан оонньоон кыра дэриэбинэҕэ саамай киһи хараҕар быраҕыллар тутуу буолан дьэндэйдэ. Ыраахтан чугастан, ыҥырыылаах ыалдьыттар, нэһилиэк олохтоохтооро ахсынньы аам – даам тымныытын аахсыбакка бу долгутуулаах күн үөрүүтүн тэҥҥэ үллэстэ кэллилэр. Үөрүүлээх чаас аалай лиэнтэтин кырыйыыга Саха Республикатын правительствотын председателин солбуйааччы Михаил Викторович Никифоров, улуус баһылыга Владимир Семенович Поскачин, үөрэх управлениятын начальнигын солбуйааччы Людмила Егоровна Николаева, Маҥаас нэһилиэгин баһылыга Николай Григорьевич Илларионов, орто оскуола ааспыт сылга үлэлээбит директора Михаил Афанасьевич Федоров, быйыл саҥа үөрэх дьылыттан үлэтин саҕалаабыт оскуола директора Алла Яковлевна Михайлова, ООО «Сахаспецмонтаж».директора Дмитрий Алексеевич Петров кыттыыны ыллылар. Сиэр быһыытынан алгыһы тойугунан, үтүөнү — кэрэни айыылартан көрдөһөн, иччилэргэ сүгүрүйэн , аал уоту арыылаах алаадьыннан, көөнньө сылдьар кымыһынан аһатыы, сцена ветерана, детсадка хас эмэ сыл үлэлээбит ветеран үлэһит Светлана Семеновна Васильева толордо. Улуус үөрэҕин управлениятыттан Калиста Васильевна Борисова, Маҥаас оскуолатыгар урукку сылларга хас да сыл директорынан үлэлээбит, Саха Республикатын үөрэҕириитин туйгуна Илья Сергеевич Прокопьев, тыа хаһаайыстыбатын управлениятыттан, тутуу, промышленность отделын специалистара, улуустан ыраах сытар, уһун айаны айаннаан нэһилиэк баараҕай тутуутун арыллыытыгар кэлэн, эҕэрдэ истиҥин, алгыс үтүөтүн анаатылар, үөрүүбүтүн тэҥҥэ үллэһиннилэр. Нэһилиэк дьаһалтатын специалистарыгар, баһылыктаан олорбут Аркадий Дмитриевич Донской ааттарыгар элбэх махтал тыллар этилиннилэр. Маҥаас нэһилиэгэ, хас да федеральнай бырайыакка үлэлээбит үлэтин үрдүктүн сыаналаан Аркадий Дмитриевич Донскойу “Нэһилиэк бочуоттаах олохтооҕо” анал ааты иҥэрдэ. Тэрилтэ ветеран үлэһиттэригэр эмиэ сибэкки дьөрбөтө, махтал суруктар туттарылыннылар. Ыаллыы сытар Далыр нэһилиэгин эдэр ыччаттара, салайааччы Федор Афанасьевич Федоров, үлэҕэ дьулуурдарын, сатабылларын көрдөрдүлэр. Таас тутуу диэн саха аймахха, тыа сиригэр наһаа тэнийбэтэх, ыарахан үлэ буоллаҕа. Саҥа таас детсад ис өттүн дизайнердаан, илиилэрин сылааһынан, араас дьэрэкээн уруһуйга тиһэн киэргэппит бэйэбит олохтоох кыргыттарбыт, Туйаара Сергеевна Тимофеева, Лидия Исаевна Григорьева, Анжела Владимировна Васильева – Федорова, Алиса Дмитриевна Трофимова буолаллар. Киһи кэрэхсиир, хараҕа быраҕыллар, оҕо эрэ таптаан умсугуйа көрүөх араас кэрэ кырасыабай хартыыналары истиэнэҕэ уруһуйдаан, кэлбит дьону сөхтөрдүлэр. Кэлбит ыалдьыттар, нэһилиэк олохтоохторо бары малааһын араас аһыттан амсайан, итии үүттээх чэй иһэн тарҕастылар. Бу дьиэҕэ үйэлэртэн үйэҕэ, оҕо аймах чуопчаарар чуор куолаһа, истиҥ күлүүтэ, үйэлэртэн үйэлэргэ бара туруо буоллаҕа.
