Салама ыйааһына — сахаҕа улахан суолталаах туом. Иэйиэхсит Хлтун ырааһы, чэнчис — чэбэр буолууну сөбүлүүр. Ити иһин хас биирдии киһи бэйэтин ыраастык тутта, көрүнэ — истинэ сылдьыахтаах. Өбүгэлэрбит өйдөбүллэринэн, киргэ — хоххо, бөххө — сыыска дьай иҥэр. Оннук сиргэ, аныгылыы эттэххэ, кирдээх энергия мустар, «куһаҕан тыын» иҥэр.
Сайылыкка көһүүгэ оҕолуун — улаханныын бары сайылыктарын балаҕанын, ампаарын, титтигин иһин — таһын ыраастыыллар. Иэйиэхсит Хотун олохсуйдун диэн балаҕан, ампаар, хотон муннуктарын кытыан лабаатын буруолатан ыһаараллар. Сааскы Ньукуолун — билигин даҕаны сахаларга улахан суолталаах күн. Бу күн биһиги айылҕаҕа чугаһыыбыт, күөххэ тахсан кэҕэ этэрин истэбит, мутукча сытын ылабыт, ньургуһун тыллыбытын көрөн үөрэбит. Саха өссө биир хаары ууллардым диэн сааһыгар биир сыл эбиллибитин айылҕа уһуктуутун кытта ситимнээн өйдүүр. Ол иһин, киһи сүрүн күрүөтэ, ол эбэтэр аурата ыраас буолуохтаах. Тулалыыр эйгэбит барыта ыраас буоллаҕына олохпут уйгута тупсар. Иэйиэхсит киһини куруук араҥаччылыы сылдьар. Кини маны таһынан киһиэхэ араас дьоҕуру биэрэр. Холобур, сүөһү көрөөччү илиитэ сымнаҕас буоллаҕына, кини көрөр — харайар сүөһүтэ төрөлкөй буолар. Күннээҕи олохпутун кытта ситимнээтэххэ. Иэйиэхсит булчут айылҕаны дириҕник өйдүүр, булугас — талыгас, баартаах, өрүү өлгөм бултаах — астаах буолар.
Уопсайынан, хайа да киһи ханнык да үлэҕэ, дуоһунаска сырыттар, Иэйиэхсити кытта эҥэрдэспит буоллаҕына барытыгар кыайыылаах — хотуулаах буолар.
Ыам ыйа — Иэйиэхсит ыйа хантан кэлбитэ, тугу кытта сибээстээҕэ эмиэ биир ыйытыыны үөскэтэр. Онно кылгастык хоруйдаатахха маннык: бу Христианствоны кытта сибээстээх өйдөбүл. Историктар этэллэринэн, Ньукуола — Николай мирликинскэй диэн киһи былыр, биһиги эрабытыгар 200 сыл бастакы аҥаарыгар Малай Азияҕа Патарах куоракка төрөөбүт. Төрөппүттэрэ кинини кыра эрдэҕиттэн христианство тыыныгар ииппиттэр. Николай кэлин манаах буолбут уонна бу итэҕэли атын норуоттарга тарҕаппыт. Кини мити үтүө өҥөтүн дьон — норуот умнубатах. Өлбүтүн кэннэ кинини ахсынньы 19 күнүгэр Мирлы куорат таҥаратын дьиэтин таһыгар көмпүттэр уонна бу күнү Ньукуолун күнэ диэн ааттаабыттар. бу күн биһиэхэ сахаларга, кыһыҥҥы Ньукуолун диэн күнүнэн биллэр. Кэлин, Мирлы куораты туроктар сэриилээн ылбыттарыгар, Италия атыыһыттара Николай Мирликинскэй өлүгүн 1087 с. ыам ыйын 22 күнүгэр Барн куоракка көһөрөн аҕалан кистээбиттэр уонна сибэтиэй Николай храмын туппуттар. Бу күнү сайыҥҥы, онтон өлбүт күнүн кыһыҥҥы Ньукуолун диэн ааттыыр буолбуттар.
