Төрөөбүт төрүт тылбыт түҥ былыргаттан дириҥ силистээх, ураты баай, хомоҕой, ылбаҕай тыл буоларын бэркэ диэн билэбит. Ол эрэн хомойуох иһин, билиҥҥи балысхан сайдыы хааччаҕа суох кимиилээх далааһынын содулуттан илэ тутахсыйар, дьадьайар эйгэтэ үөскээтэ.Ол курдук бэл күннээҕи кэпсэтэр тылбытыгар сахалыы салаҥнык саҥарар, сатаан сааһылаан ыпсарбат, киирии тылы кыбыппакка кыайан кэпсэппэт, санаабытын сайа эппэт кэммит кэллэ. Иитиллибит Ийэ тылбытынан истиҥник — иһирэхтик иилэһэн, Сахабыт сайдам саҥатынан сайаҕастык сайа тыынан төрөөбүт төрүт тылбыт төлкөтүн түстүөҕүҥ, удьуору утумнаан уу сахалыы тыллаах буолуоҕуҥ!
