Алтынньы 14 күнэ — Сахабыт сирин былааҕын күнэ. Государственнай былаах сокуонунан бигэргэнэн, 1992 сыл алтынньы 14 күнүгэр өрөспүүбүлүкэ Үрдүкү Сэбиэтин административнай дьиэтин үрдүгэр Арассыыйа үс дьураалаах андреевскай былааҕын кытта кэккэлэһэ, ортотугар үрүҥ күн туоһахталаах өрөспүүбүлүкэбит былааҕын таһааран ыйаабыттара.
Ол күнтэн ыла саха былааҕа аан дойду государстволарын, Арассыыйа Федерациятын былаахтарын кэккэлэригэр эрэллээхтик, күөрэччи өрө көтөҕүллэр. Ортотугар күннээх былаахпыт саха норуотун инникигэ угуйан, күөх халлааҥҥа эрэллээхтик тэлимниир.
Былаах 4 өҥнөөх, ол курдук: от күөх — уйгу-быйаҥ, халлаан күөх — ыраас эйэлээх халлааны, кыһыл — олох кэрэтин ойуулуур, төрөөбүт дойдуга бэриниилээх буолууну — бэлиэтииллэр. Оттон былаах үөһэ ортотугар үрүҥ күн — өбүгэлэри кытары ситими көрдөрөр.
Саха Өрөспүүбүлүкэтин Судаарыстыбаннай былааҕын дьүһүннэрэ Арассыыйа Федерациятын Судаарыстыбаннай былааҕын өҥнөрүн кытары дьүөрэлэһэр. Ол аата Арассыыйаны кытта биир сомоҕо буоларын көрдөрөр.
Уһуйаан иитиллээччилэрэ үс халлаан өҥнөөх, аламай маҥан күннэх, үс суол дьураалаах, саха норуотун киэн туттар былааҕын кытта билистилэр.
